الشامل المحترف

كلم بنيات الجرِف تتبرا من بحرا غدر
إتغابى ماراعى الوِلِف صاد الإخيتين بي قدر..

ليكـ حق يعافيك الحراز وليصطفيكـ طرف وعُشر
يا متوكـ الناس العُزاز ونابع ياقليبكـ من حجر 
مابتنفع انت بلا الخريف الصاقِعي والريح والمطر
تنزف نزيف مابحوشو قيف لامن يقولو عليكـ ختر
ما اظن نخيلكـ هَزّ فوق سيرة عريس نازلي البحر
ماطالا موجكـ مابيضوق ليضوق الناس غير كدر..

كلم بنيات الجرِف وكل البنيات من طرف
ماينظُمن لي فد حرِف في الخان عهودن وانجرف
ياريتو بس لو كان عرف حال البشابن بي لهف
لي حُضنو الا المتلهف لي عز شبابن كف ختف

عودِلو قشكِن النِشف يطغي ورويسات السعف
مكسور خِويطرا في قِحف ترغِي وتسِف ملح الأسف
عودِلو والسِنبر يرِف جِنحاتو بالاشواق سِحر
قاصد جِريف ودشيخ يخِف لي مويتو من دون البحر
والليلي زي غيما رِعف حين طال علي ريحو السفر
ياحليلو زينا ماعرف جوز القميرتين إنطفر

يادنيـا يانا رِبــاة كتف رغم الفجايع لارجف
لاقال عوارضي ابت تخف في بالو كم تاريخ سلف..؟
{لو كان يشيل في الموت زرف دمعات أسى وحُرقة وأسف
او بالعلي الحال يعترف كان عند رسول الله وقف}

كلم بنيات الجرِف وكل المكاليم من طرف
هي الدنيا كلها كم حَرف لامن يطول فيها الأسف.